د خوست د علماوو شورا د پخواني مشر زوی: پلار مې طالبانو نیولی

188
د کتلو شمېره

په خوست کې د علماوو شورا د پخواني مشر مولوي محمد سردار ځدراڼ د کورنۍ غړي وایي چې نوموړی طالبانو نیولی دی.

 
د مولوي ځدراڼ زوی سمېع‌الله ځدراڼ رسنیو ته وویل چې پرون سهار مهال د طالبانو د امنیت اړوند کسان په دوه رنجر موټرو کې کور ته ورغلل او پلار یې له ځان سره بوت.
 
سمېع‌الله وایي: "د دوه ساعتونو په مخه د مولوي صاحب موبایل ټیلیفونونه بند ول. له هغې وروسته موږ د فېس‌بوک له لارې عکسونه ولیدل چې د مولوي صاحب سترګې یې تړلې وې او لیکل شوي و چې نوموړی نیول شوی دی."
 
سمېع‌الله ځدراڼ وایي، د طالبانو کسانو یې پلار ته ویلي و چې د خوست والي غواړي ورسره وویني، خو وروسته څرګنده شوه چې پلار یې د دې ولایت د ملي امنیت ریاست ته وړی او تر اوسه ورسره بندي دی.
 
نوموړی وایي، سره له دې چې طالبانو عمومي بخښنه اعلان کړې، نه‌پوهېږي چې پلار یې ولې دوی بندي کړی دی.
 
د طالبانو ویاند ذبیح‌الله مجاهد رسنیو ته وویل چې د دې پېښې په اړه څېړنه کوي او نتیجه به‌یې وروسته له رسنیو سره شریکه کړي.

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

علمي او مالوماتي